الخروف والحب

الخروف زي الحُب  يقعد يمأمأ لحد ما يندبح علي العيد

وممكن قبل العيد وممكن برده بعد العيد وهو وظروفه

ممكن واحد يسأل إيه علاقة الخروف بالحب؟الإجابة ببساطة مش عارف

بس إفتكرت العيد الكبير ومنظر الخروف وهو بندبح ودار في دماغي

  شوية علاقات بين الناس بتندبح من غير سبب مقنع وبدون تفكير.

جيت أقارن بين الخروف والحب لقيت الخروف أحسن بكتير من الحُب

عل الأقل دبح الخروف نفسه له معني وفرحه وكمان فيه لحمة وفرو

أما دبح الحب قسوة وغمامة علي القلب وإنتهاك لكل معني جميل طبعا انا

بقصد الحب كله بأنواعُه وأشكاله

فين الكلام عن الحب والوفاء والإخلاص هو كلام وبس؟ برده مش عارف!

ممكن تسمع كلمة الحب تشليون مرة في اليوم لحد ما فقدت معناها وبقت كلمة

عادية خالص ماتساويش فتح الفم وقفله يعني تلاقي واحد بقولك إنت الأمل والمُني والدُنيا

والأحلام وتلاقي القلم نازل يرف علي قفاك منه، الظاهر إن هو ده الحب العصري!

لا وإيه عنده أسباب مُقنِعه ويصعب عليك وناقص تعيط جنبه

ولا واحده تسقيك الحب والغرام في كاسات الهنا وتتجوز واحد تاني وبرده عندها أسبابها المُقنِعه

والأمر من كده وكده إن كل الناس مظلومين اللي يقولك انا عيبي إني بصدق الناس والتاني يقولك

أنا عيبي إني بحب الناس والتالت أصل انا طيب أُمال مين الغلطان ولا فين الغلط

برده مش عارف!

دلوقتي اللي هقرأ الكلام ده هيقول صحبنا واحد صابونة والحقيقة مش كده خالص دي علبه رابسو من الحجم العائلي

الظاهر إن انا سُخن وبخرف والتخريف برده جاي من خروف

وكل خروف وإنتو طيبين