الديموقراطية

إيه معني كلمة الديمقراطية هل هي مرادف للملوخية

ولا للحرية

طيب لو معنها الملوخية يبقي نخرط عليها شوية توم مع كُسبرة علي شوية شوربة

ونسقي فيها ونبقي بنسقي في الملوخية أقصد في (الديموقراطية)

طيب لو هيا المعني التاني (الحرية) يعني كل واحد يعمل اللي عايزه ممكن مثلا واحد يشوف قرد

ويقول عليه غزال هو حر يطلع له واحد تاني ويقوله لا ياعسل دي مش ديموقراطية دي حمُرية

طبعا العملية تسخن معاه وممكن ينوله بحاجة في دماغه وهو يرد عليه التاني وكبرت العملية

بلاش دي؟ واحد قاعد في البلكونة ومزاجه عِنب وعامل كوباية شاي محترمة وبيسمع شعبولا

ومعلي التسجيل علي الأخر والعملية مشعشة معاه طبعا هو حر

 بس سعادك راجع من الشغل تعبان وعايز تنام  شوية ومش عارف من صوت التسجيل العالي

برده إنت حر تنام ولا عنك ما نمت إنت حر

كلمة منك كلمة منه وطي التسجيل عايز أنام ما تنام وأنا مسكك أنا حر ولعت حريقة

وقيس علي الموضوع ده حجات كتير قوي هتلاقي كل الدنيا شبكة في بعضها بسبب الديموقراطية

طبعا إحنا مجبناش سيرة السياسة ولا بلاد بتدمر بلاد تانية بسبب الديموقراطية ولا حكومات بتدي

للشعوب علي قفاها لنفس السبب ولاتاجر بيستغل الناس ويقول أنا دافع دم قلبي أنا حر

يطلع لك في النهاية واحد فيلسوف ويفسر لك معني الديموقراطية أو الحرية

حريتك تنتهي عند بدأ حرية الأخرين

كسبنا صلاة النبي (عليه الصلاة والسلام)

وتقف مبلم مش فاهم يعني أيه حريتك وحرية الأخرين وأنا مالي ومال الأخرين

مش برده كل واحد حر؟

 يعني أقوله غزال  نقطة وإنتهي وهو يقول حمار نقطه إنتهي

وطي التسجيل نقطة إنتهي مش موطي التسجيل نقطة إنتهي

ده إيه الهم ده؟ نمشيها ملوخية أحسن كده كده في الأخر كله هيوصل للصرف الصحي

نقطة إنتهي