بسم الله الرحمن الرحمن     أوباما وقهوة الانشراح       أحلي تحية وسلام ومحبة علي كل حبايبنا وحبايب حبايبنا وسمعني أحلي سلام مصري مربع تحية للريس أوباما اللي شرفنا في مصر.وأوباما أتهز هزا فرح محمود وعزة وباب البيت مكسر عايز ترباس ورزة.اكتب النهاردة بمناسبة زيارة الرئيس الامريكي أوباما لمصر وانا شخصيا بأحب الراجل داة فهو متواضع شفت ازاي بينزل من علي سلم الطيارة بينط نط تحس انة واحد منا وان السلك كان ضاربة وياما كان بيجري ورأء الاتوبيس زيي بالضبط بجانب انة مثقف وذكي ولونة لونا يعني البشرة السمرة وشفايفة زرقاء دليل انة كان بيضرب انفاس وهو صغير وسبب ذكر قهوة ألانشراح في البداية هو أن قهوة الانشراح تقع في حي عابدين علي ناصية سوق الاتنين وشارع الشيخ ريحاني والقهوة دية بيقعد عليها اخوانا النوبيين والسودانيين وفي القهوة دية تشوف اشكال كتير اوي تشبة أوباما. وللعلم اوباما داس قوي في الفطار اللي كان معمول لية في مصر شوية فول بالزيت الحار وطعمية سخنة وعيش صابح وحبة طرشي وعسل اسود وفطير الف هناء وشفاء.المهم انه وجد ترحاب وحفاوة في استقبالة وكلنا تفائلنا خير بخطابة الحلوة وطريقة القائة ووشة اللي كلة عزة وفخر وتواضع ماهو جذورة افريقية بجانب ان الرجل دة عمل دعاية حلوة للدين الاسلامي ولمصر.ألشى اللي مش حلو وهو تكملة لما كتبت عنة قبل كدة  في مصر بس هو ان أهالي منطقة السيدة عائشة وجامع السلطان حسن والمناطق المحيطة لم يكونوا متوقعين ان تعود المنطقة لما كانت علية قبل الزيارة يعني الحكومة نضفت المكان وغسلت الشوارع وشالت مقالب الزبالة ومشت الباعة الجائلين ونقلوا مواقف الميكروباس العشوائية ومفيش نصف ساعة يامعلم  من رحيل أوباما وخروجة من السيدة عائشة الا في ثانية صدرت الاوامر وسخ ياأبني بسرعة وشيل الورد ورجع كل حاجة زي ماكانت وكأن الناس ماتستهلش تعيش في نظافة الا في  الزيارات المهمة بس غلبان شعبنا والله الخلاصة ان أوباما شعر بترحابنا لة بس مش هو اللي حيحل مشاكلنا  اهم  حاجة ان ابن المؤذية بوش غار في ستين داهية وزي ماقال شعبولا  خلاص مالكش لازمة يابوش ياابن اللذينا تستاهل ألف جزمة علي اللي عملتة فينا وبصراحة مقدرش اغشك وأقول زعلت عليك ياريتها جت في وشك وخزقتلك عينيك        ليليتكم  فل

 سم سم