عيش في الملعب مصر بتلعب        

 مساء كلة كورة ولعب حلو وتشجيع وحماس لفريقينا القومي المصري اللي عامل شغل حلو في جنوب أفريقيا في بطولة كاس العالم للقارات.وباحبك يافريقينا باحبك من سكات بأقولها بالانجليزي وبكل اللغات .يعني نقدر نقول ان التحدي سمة من سمات المصريين ووقت الجد بتطلع الطاقة المكمونة جوانا ففي ماتش البرازيل وبعد ماكنا مغلوبيين 3 1 في الشوط الاول نزلنا في الشوط التاني يامعلم دخلنا كمان هدفين ملعوبيين مازيكا ولولا الحكم الانجليزي ابن الفقرية كنا طلعنا تعادل ولكن اتغلبنا 4 3 بكل شرف بعد ضربة الجزاء التي حسابها ولكن كانت هزيمة بطعم الفوز نفس ظلم الحكم تعرض لة فريق اسود لينز في فيينا يوم الاحد اللي فات يعني بعد ماكسبوا ماتشين الحكم قال علي جستي لوكسبوا تاني وقلب الماتش عليهم بقراراتة ولولا الرجالة مسكت نفسها كان الملعب اتفرش جتت. المهم فريقينا عمل المفاجاة السارة قوي في ماتش ايطاليا وكسبها واحد صفر واثبت ان فريقينا تقيل قوي ويتعمل لة الف حساب والطلينا تاهوا ياولاد الحلال وقاعدين لية ماتقوموا تروحوا  وطب شد ألاستيك ايطاليا بلاستيك يعني باختصار غسلنا بطل العالم والفوز دة نسانا شوية هزيمتنا من الجزائر ولكن معلش لسة في امل وحتترد ليهم في استاد القاهره يارب. المهم صدقت نبواة واحد اعرفة دماغة عالية علي طول قالي الايطالي عندة رجل يمين المصري كمان عندة رجل يمين الايطالي عندة رجل شمال المصري عندة كمان رجل شمال الايطالي دماغة لايمكن تبقي زي جمجمة المصريين وختم كلامة وقال زي ماشربنا البن البرازيلي وبهدلناهم حنأكل البيزا الايطالي وحنغلبهم وفعلا صدق وعقبال مانكسب امريكا يوم الاحد لان اي فوز لفريقينا بيسعد شعبنا جامد وهو مشتاق للفرحة حتي ولو جت عن طريق الكورة في زمن قلة فية الفرحة وسيكا سيكا سيكا قسم يابو تريكا ويازيدان يامعلم خلي الشبكة تتكلم ويارب النصر لمصر دايما

سم سم