|
لامؤاخذة يا دكتور
أكيد كُل اللي حضر اليوم العائلي الجميل للجمعية حضر كمان مُحاضرة الدكتور/
حمدي مصطفي وسمع وشاف
الحلاوة وعظمة العلم والعلماء،
وكمان بالصوت والصورة شرح العمود الفقري وتقسيمته لحد العصعوص وبصراحة
الواحد إستفاد علي الأقل عرفت ليه
لما حد يحب يغيظ واحد رفيع يقوله يا معصعص وده لأنه شبه فقرات العمود
الفقري اللي إسمها العصعوص
بس الحاجة اللي وقفت عندها ولقيت دماغي لفت والنضارة إحمرت؟
إن الدكتور / حمدي قال إن الإنسان بيطول بالليل من 1 إلي 3 سنتيمتر وده
نتيجة إسترخاء الفقرات
وتشبعها بالسائل طبعا كلام علمي أكيد وأنا شخصيا مصدقة بس حبيت أجربه عملي
وكل يوم الصبح وبالليل أقيس طولي مش قادر أوصل للفرق ، عملت محاولة تانية،
وقُلت لمراتي خدي المتر وقيسي طولي وأنا نايم ،الظاهر والله أعلم قالت ، إن
الراجل مخه ضرب وأخدتني علي قد عقلي،
قلت لنفسى أعمل
إستطلاع للرأي علي بعض الناس اللي أعرفهم وكانت النتيجة مذهلة لإن بعضهم مش
فاهم السؤال
وقلت أعرض عليكم النتيجة،
وكان السؤال واحد، بس الإجابات مختلفة
والسؤال هوه
هل الإنسان بيطول بالليل من 1 إلي 3 سنتيمتر نتيجة إرتخاء فقرات
العمود الفقري وتشبعها بالسائل؟
والإجابة كانت الأتي
أول ناس قالت الكلام ده في السيما ! ليه ياعم الحاج إنت وهو...
إنتو
فاكرين فؤاد المهندس وعبد المنعم مدبولي
لما كانو بيلبسو البناطيل القصيرة،
..قلت له طبعا ..،قالوإن البناطيل كانت
مظبوتة عليهم
ومثلو بالليل فطولو وبالتالي البناطيل قصرت عليهم، يعني العملية مكنتش
فُكاهه، دي عملية علمية بحتة!!
!وكمل واحد وقال يعني المفروض الواحد يشتري هدوم
للنهار وهدوم لليل ! أصل احنا ناقصين مصاريف
وتاني قال كلام مختصر ومفيد للغاية
أأأأأأأأأأأأه علشان كده أنا عرفت السبب !
وأنا كل يوم بالليل أقول البجامة قصيرة ليه، ده شاري المقاس بتاعي
وأصحي الصبح ألاقيها مظبوتة ! والموضوع ده فضل شاغلني شويه ومش عارف له سبب
وناس تانية قلت ياريت الواحد يطول بالليل ولو نص سنتيمتر بلاش 3 أصل
العملية بقي شكلها وحش قوي
وناس تالته قالت وإحنا هفضل نطول ونقصر كده كتير، الخوف إن الفقرات يحصلها
حاجة والعملية تتعكس وإنتو عارفين تغيرات الجو
يعني الواحد يفضل يقصر علي طول، أو يطول علي طول ،يبقي إيه الحل
يادكتور؟ربنا يستر
الأهم من كل ده إن الناس اللي عدو الخمسين سنه عازين عنوان الدكتور/ حمدي
علشان يتأكدو بنفسهم
لأنهم بيقولو إن العملية معكوسة عندهم، بيطولو بالنهار وبيقصرو بالليل،
وبالذات ليلة الأجازات ،والمضوع ده تاعبهم نفسيا
ونفسهم يطولو ولو حتي مليمترات ؟
وبيقول إنهم مصدقين العلم والعلماء والدليل إنهم بيحسو بإرتخاء الفقرات
بالليل بس عملية الطول دي ممشكوك فيها!
والمعلومة التانية اللي مش عايز أتكلم عليها ،إن العمود الفقري هو عبارة عن
سوستة للإنسان،وإن السوستة عبارة عن العمود الفقري للبنطلون، خليها للمرة
الجاية إن شاء الله
لامؤاخذة يادكتور أنا بحبك بس مش قادر أخبي عليك نتيحة الإستطلاع!
ثم إنت مش عايزنا ننقد حد،يبقي إستحمل شوية؟
|
