بسم الله الرحمن الرحيم

 هو في أية

 أزاي حالكم ياهل بلدي ياطيبين قولولي اية جري لية زعلانين دية اللقمة

 كانت تنقسم والكل راضي والوش كان كدة مبتسم والطبع هادي أزاي

حالكم قولولي مالكم. مساء الخيرات علي كل ناسنا وصحابنا وأهالينا من

 مصريين وعرب مسلمين ومسيحيين سبب كلامي دة والدخلة دية هو

انني لاحظت في الاونة الاخيرة ان الناس والصحاب بوجة عام وفي

 مدينة لينز بوجة خاص اضرب فيهم لغم يعني كل واحد طار في حتة

 وأتعور وأتلخم جامد في نفسة وبعدوا قوي عن بعد وكان الاحساس

 والود مابقاش لة قيمة والاخلاص بقي مودة قديمة يعني اللي يأكد

 كلامي دة عن بعد الناس عن بعض هو شهر رمضان اللي فات لان في

 السنوات اللي فاتت كان كل واحدبيعمل يوم فطار جماعي في مسجد

 الرحمن في لينز وفي هذا اليوم كان كل الصحاب بيتلمواويشاركوا في

 اعداد الاكل للصائمين وبعد الفطار والصلاة كانت بتبقي في قعدة حلوة

 مع الصحاب ومنهم من كان بيجيب معاة صنينة كنافة عاملها في البيت

 ومنهم من كان بيجيب معاة حلويات وكانت بتبقي قعدة كلها ود وحب

 وضحك .اللي حصل في رمضان دة شي مختلف تماما وكان تقريبا طوال

 الشهر كلة وهو عندما رحت ساعة الفطار علي اساس اننا عامليين فطار

 جماعي للكل اول مادخلت وجدت جنسيات مختلفة كتير من الصومال

 والسودان وموزمبيق وبوركينا فاسو والعراق والشيشان ووزيرستان

 وكردستان وبلاد ملوك الجان كل داة كويس وثواب ولكن قعدت ادور علي

 واحد مصري الاغية ويلاغيني واباصي لية نكتة وهو يديني افشة ولكن

 مفيش فين وفين لما ظهر واحد جاء متاخر علي عجل المهم ضربت

 معلقتين رز بسرعة وطرت وانا باقول لنفسي هو فية اية .يعني الباين

 من الحال داة ان في ناس مخنوقة وناس متضايقة وناس مش طايقة

 لبعض كلام وناس مرتاحة وفايقة ورايقة وناس بتتحايل علي الايام المهم

 ياجماعة يارب الكل يرجع زي الاول وكل النفوس تتجمع علي الحب

والخير علشان لما الواحد يقول تعبت يلاقي اللي يقول لة هات ايدك من

 غير ماينادي ويارب مايكنش بيينا قلب أسي ولا مين بيعادي يارب

 سم سم